Í þessu verkefni láta nemendur sig dreyma um draumaframtíð fyrir okkur og fyrir jörðina. Verkefni sem byggir á bakrýni sem er er gagnleg leið til að takast á við flókin viðfangsefni líkt og loftslagsbreytingar og eru valdeflandi fyrir nemendur.
Markmið:
Nemendur láti sig dreyma um bestu mögulegu framtíð fyrir sig og jörðina
Nemendur beiti heildrænni hugsun og taki tillit til margra þátta
Nemendur tengi saman gott líf fyrir sig við gott líf fyrir aðra
Framkvæmd
Kennarinn: Kennarinn kynnir verkefnið með spurningu til umhugsunar eða umræðu ef tíminn leyfir: Er bara ein framtíð? Ef ekki, þá hvað eru margar mögulegar framtíðir? Hvað finnst ykkur um framtíðina? hafið þið val um margar framtíðir? getið þið haft áhrif á framtíðina?
Í þessu verkefni ætlum við að láta okkur dreyma um draumaframtíðir fyrir okkur og fyrir jörðina.
Byrjum á að hugsa um framtíðirnar og dreyma um hvað okkur langar í. Þá skoðum við spurningarnar um þá þætti sem við þurfum að huga að líka. Síðan búum við til mynd, sögu, upptöku, eða eitthvað annað, þar sem við sýnum drauma okkar fyrir okkur og fyrir allt sem spurt er um í verkefninu.
Geymum draumana og endurskoðum þá síðar. Í lok árs, á næsta ári, eða jafnvel í lok skólagöngunnar.
Ef tími leyfir er tilvalið að kynna fyrir hinum í bekknum
Nemendur: Ímyndaðu þér að það sé sólríkur sumardagur árið 2040 og þú býrð á draumastað. Gefðu þér nokkrar mínútur til að láta þig dreyma um þína draumaframtíð.
Skrifaðu niður svör við spurningunum hér fyrir neðan.
- Hvernig er draumastaðurinn þinn? Hvernig er húsið sem þú býrð í? Hvað er í kringum húsið?
- Hvernig er lífið þitt? Hjá hverjum býrðu? Við hvað vinnur þú? Hvað gerir þú í þínum frítíma?
- Hvernig hafa hinir í nærsamfélaginu það? Eins og þú eða öðruvísi?
- Hvaðan kemur maturinn sem þið borðið? Fötin sem þið eruð í? Dótið sem þið eigið? Hvernig fer fólk um?
- Hvernig er náttúran þar sem þú býrð? Loftið, vatnið, moldin, gróðurinn? Hvaða dýr búa þar–fuglar, spendýr, skriðdýr, fiskar, froskdýr, pöddur?
Búðu til mynd eða sögu eða upptöku eða eitthvað annað? af draumaframtíðinni þinni. Hér má til dæmis notast við skapandi skil.
