Hvernig standa fyrirtæki og stofnanir og stjórnvöld sig þegar kemur að umhverfismálum? Nemendur fara í heimsókn í fyrirtæki eða stofnanir í nærumhverfinu og bjóða upp á umhverfismat þar sem nemendur leggja gátlista fyrir fulltrúa fyrirtækjanna/stofnana og koma svo með hugmyndir að úrbótum.
Aldur: Leikskóli, grunnskóli, framhaldsskóli, háskóli
Tími: 4 kennslustundir. 1 til undirbúnings, ca. 2 fyrir heimsókn (fer eftir vegalengdum) og 1 til úrvinnslu.
Markmið:
Að nemendur kynnist fyrirtækjum og stofnunum í sínu nærumhverfi.
Að nemendur miðli upplýsingum um umhverfismál til aðila utan skólans.
Að nemendur bendi fulltrúum fyrirtækja og stjórnvalda á þeirra ábyrgð þegar kemur að áskorunum sem tengjast umhverfismálum.
Efni/áhöld: Gátlistar. Hægt er að notast við gátlista hvers skólastigs, skoðað gátlistann og aðlagað að heimsókninni.
Framkvæmd
Skipuleggja má heimsóknir þar sem nemendur framkvæma umhverfismat með fulltrúum fyrirtækja eða sveitarstjórna. Komast má í samband við fyrirtæki, stofnanir eða stjórnvöld (t.d. sveitarstjórn) með aðstoð nemenda, kennara og fjölskyldna. Nemendur í nokkrum Grænfánaskólum hafa gert þetta með góðum árangri og hafa m.a. notast við gátlista Grænfánans.
Undirbúningur í skólanum
- Kennari kynnir verkefnið og tilgang þess.
- Nemendur fara í hópa og ákveða hvaða fyrirtæki eða stofnun á að heimsækja.
- Skoða saman meðfylgjandi gátlista og ræða:
- Hvað viljum við skoða sérstaklega?
- Vantar spurningar á listann?
- Hver spyr hvað?
- Hóparnir útbúa stutt og kurteis kynningarorð fyrir heimsóknina.
Í heimsókn
- Nemendur hitta fulltrúa fyrirtækisins eða stofnunarinnar og kynna tilgang heimsóknarinnar.
- Hópar vinna með gátlistana, kanna aðstæður og spyrja spurninga.
- Nemendur eru hvattir til að:
- Skrá niður athugasemdir
- Nefna jákvæða hluti
- Finna tækifæri til úrbóta
- Vera kurteis
- Ef leyfi fæst má taka myndir til heimildar.
Eftir heimsókn
Nemendur vinna úr gögnum og setja saman:
- 3–5 tillögur að raunhæfum úrbótum
- Stutta samantekt um stöðu fyrirtækisins/stofnunarinnar
- Yfirlit yfir styrkleika og tækifæri
- Skýrslu eða stutta kynningu á heimsókninni og niðurstöðum
Tillögurnar eru svo sendar:
- Til viðkomandi fyrirtækis/stofnunar
- Mögulega til sveitarstjórnar
- Miðlað í skólanum eða til fjölmiðla
Hægt er að fylgja málinu eftir nokkrum mánuðum síðar og kanna hvort breytingar hafi orðið Verkefnið fylgir námsefninu Hreint haf – plast á norðurslóðum eftir Margréti Hugadóttur sem kom út haustið 2021 á vegum Landverndar og Menntamálastofnunar.
