Nemendur velta fyrir sér hvað felst í umhverfisvænum lífstíl, kynna sér málið og útbúa námskeið fyrir jafnaldra eða almenning.
Aldur: unglingastig, framhaldsskóli, háskóli
Tími: 4 kennslustundir
Markmið:
Að nemendur átti sig á hvað felist í því að vera ábyrgur neytandi
Að nemendur fái verkfæri til þess að taka skref í átt að grænum lífstíl
Að nemendur öðlist skilning á helstu hugtökum umhverfisfræðarinnar
Að nemendur átti sig á gagnsemi hringrásarhagkerfisins
Aðferð:
Nemendur setja sig í spor námskeiðshaldara, þeir útbúa fræðslu fyrir almenning um hvernig megi lifa umhverfisvænum lífstíl og minnka þannig vistspor sitt. Fræðslan getur verið í formi hlaðvarps, fyrirlesturs, myndbands eða blaðagreinar.
Þeir afla sér upplýsinga um:
- Hvað felst í því að vera ábyrgur neytandi
- Hver eru helstu umhverfismerkin og fyrir hvað standa þau
- Hvað er það sem hefur áhrif á vistspor einstaklinga og hvernig má minnka vistsporið
- Hvaða leiðir er hægt að fara til þess að henda minni úrgangi
Verkefnalýsing fyrir nemendur:
Þið fáið það verkefni að útbúa fræðslu fyrir almenning um það hvernig hægt er að stuðla að sjálfbærni í daglegu lífi. Námskeiðið á að nýtast öllum þeim sem vilja taka skref í átt að grænum lífsstíl en vita ekki hvar á að byrja.
Á námskeiðinu/fyrirlestrinum er fjallað um
- Hugtökin sjálfbærni, vistspor og hringrásarhagkerfi
- Hvernig er best að haga innkaupum með tilliti til umhverfisins, fræðsla um 2-4 umhverfismerki
- Hvernig lengja má líftíma ákveðna matvæla
- Hvaða lausnir eru til að takmarka umbúðir
- Mismunandi ferðamáta – almenningssamgöngur, einkabíllinn, hjólið. T.d skoða áhrif þeirra á lýðheilsuna
- Hvernig hægt að lengja líftíma hluta sem við eigum nú þegar?
Höfum áhrif! Nemendur deila verkefninu með öðrum innan skólans og jafnvel í nærumhverfinu. Hægt er að senda myndbönd, hlaðvarp og blaðagreinar á fjölmiðla og jafnvel halda fyrirlestur á sal fyrir starfsfólk, nemendur eða íbúa í nærumhverfi skólans.
