Vegna gífurlegrar eftirspurnar eftir vatni í landbúnaði og iðnaði er í mörgum löndum gengið mjög nærri grunnvatnsbirgðum auk þess sem mengun grunnvatnsins er víða raunverulegt vandamál. Nemendur skoða aðgengi fólks víðvegar um heiminn að hreinu vatni.
Tími: 1-2 kennslustund
Aldur: unglingastig og framhaldsskóli
Markmið:
Nemendur fræðast um aðgengi fólks að hreinu vatni og hreinlætisaðstöðu í ólíkum löndum og hvernig efnahagur, umhverfi og samfélagsaðstæður hafa áhrif á þessi grundvallarréttindi.
Nemendur íhuga hvaða aðgerðir einstaklingar, skólar og samfélög geta gripið til til að styðja við aðgengi að hreinu vatni á heimsvísu og leggja fram hugmyndir um raunhæfar leiðir til að stuðla að umbreytingu eða stuðningi.
Framkvæmd
Notast er við verkefnið Dollar Street er verkefni sem var stofnað af Gapminder Foundation og hefur það að markmiði að sýna hvernig fólk lifir við mismunandi fjárhagsstöðu um allan heim. Verkefnið lýsir heimilislífi fjölskyldna út frá ólíkum efnahag, frá mjög fátækum heimilum upp í mjög auðuga. Hægt er að skoða myndir sýna daglegt líf einstaklinga, heimili og húsnæði í ýmsum löndum.
Nemendur fara inn á vef Dollar Street og skoða myndir af heimilum frá fátækum, meðal og auðugum heimilum í mismunandi löndum.
Notaðu leitargluggann til að skoða t.d. “water” (vatn) eða “toilet” (salernisaðstaða) og berðu saman mismunandi heimili.
Veljið eitt land og eina fjölskyldu úr hverjum efnahagsflokk til að bera saman aðgengi að vatni og hreinlætisaðstöðu.
Skrifaðu stutta samantekt (ca. 150–200 orð) þar sem þú:
- Lýsir hvað þú hefur séð og borið saman.
- Útskýrir hvaða áskoranir fólkið stendur frammi fyrir.
Í framhaldinu er tilvalið að skoða hvort nemendur á Íslandi geti á einhvern hátt aðstoðað við að auka aðgengi annarra að hreinu vatni. Dæmi eru um að Grænfánaskólar hafi safnað fyrir vatnsbrunnum með því að safna áheitum.
